El paese onde ga scominsià a sità de Coeombo ze nassesto sol 1878, quando un grupo de imigranti comandà par el prete Angelo Cavalli, pàroco de Oliero, ze rivà soe tere rente a Curitiba, sol Stato del Paranà, Sud del Brasie. Iuri i ze vegnisti dei comuni che uncó ze el Valbrenta (Valstagna, San Nazario e Campolongo sul Brenta), Romano d’Ezzelino, Lusiana Conco, Nove, Marostica e Bassano del Grappa e i ga formà a Coeònia Alfredo Chaves, che sol 1890, insieme con nantre coeònie dea region, i ga formà a sità de Coeombo.

Fin i primi ani de 1900 ze rivai nantri vissentini, ma anca trevisani, beunesi, paduani, venessiani, furlani, ancora trentini e lombardi, e persone de nantre culture, soratuto i poeachi. El laoro de queste famégie, insieme coi brasiliani che anca stea qua, i ga fato questa coeònia sgrandir e vegner fora un bel posto, con produssion agrìcoea, coi negossi, con scòee e cese.

Ghimo imparà a magnar poenta, formàgio, saeado, risoto de poeastro con durei, tagiadee, grùstui, fortàgia e tante altre robe bone che ze fate fin uncó. Ghimo scominsià a dugar bòcia, mora, trissete, baeneto, brìscoea, scopa… Ghimo anca imparà a pregar pa a Madona del Rosàrgio, San Roco, Santo Antonio Abade, San Nazario e San Bovo. I ze queste tradissiuni culturai che e mantegne su e radise vénete a Coeombo.

A éngua anca a fa parte dee tradissiuni. Ma quando ghe gera a Seconda Guera Mondiae, nostri nuni i ze stai proibii de palar i sui diaeti soe tere brasiliane, coa “Campanha de Nacionalização”, che ze stà raforsà su’n quel tempo. A paura e a vergogna e ga fato con che tante famégie assasse de portar avanti questa eransa culturae par i so fiui e questo ga tasà su a stòrgia de questi dissendinti. Dopo tuto questo, qualcheduni ancora i ga continuà a palar, dee volte scunti, soe regiuni pi in campagna e a éngua se ga mantegnesta rento casa.